Հրապարակվել են Ալիևի նախկին աշխատակազմի ղեկավարի՝ իշխանությունը զավթելու փորձի մեղադրանքով գործի մանրամասները
Ադրբեջանական լրատվամիջոցները հաղորդել են Ադրբեջանի նախագահի աշխատակազմի նախկին ղեկավար Ռամիզ Մեհդիևի դեմ հարուցված քրեական գործի որոշ մանրամասներ։
Ըստ APA-ի տեղեկությունների՝ Պետական անվտանգության ծառայությունը (ՊԱԾ) Ռամիզ Մեհդիևի շուրջ համապարփակ օպերատիվ-տեխնիկական միջոցառումներ է իրականացրել դեռևս նրա դեմ քրեական գործի հարուցումից շատ առաջ։
Կա Սաբայիլի շրջանային դատարանի 2025 թվականի օգոստոսի 13-ի որոշումը, որով թույլատրվում են այդ միջոցառումները։
Այս շաբաթ Ռամիզ Մեհդիևի փաստաբանները վերաքննիչ բողոք են ներկայացրել տնային կալանքի կիրառումից առաջ ընդունված մի քանի որոշումների դեմ։ Այդ նպատակով նրանք ուսումնասիրել են ՊԱԾ-ի հարուցած քրեական գործի նյութերը, ինչպես նաև Սաբաիլի շրջանային դատարանի՝ ՊԱԾ-ի միջնորդությամբ ընդունած որոշումները։
Ըստ տեղեկությունների՝ հաղորդակցությունների խափանումը, ինչպես նաև «Şərq-Qərb» հրատարակչության և այլ հասցեների խուզարկությունները կատարվել են այս դատարանի որոշման հիման վրա։
Նախկինում լրատվամիջոցներում շրջանառվող հաղորդագրություններում որպես Մեհդիևի փաստաբան նշվում էր միայն Զաուր Աբիևը։
Ըստ APA-ի տեղեկությունների՝ Մեհդիևն ունի ոչ թե մեկ, այլ երեք փաստաբան։ Նա վարձել է ևս երկուսին, որոնց անունները դեռևս չեն հրապարակվում։
Ավելի վաղ՝ հոկտեմբերի 14-ին, Բաքվի Սաբայիլի շրջանային դատարանը Մեհդիևին չորս ամսով տնային կալանքի է ենթարկել։
Պետական անվտանգության ծառայության հարուցած քրեական գործի շրջանակում նրան մեղադրանք է առաջադրվել Ադրբեջանի քրեական օրենսգրքի 278.1 հոդվածով (պետական իշխանությունը զավթելուն ուղղված գործողություններ), 274 հոդվածով (պետական դավաճանություն) և 193-1.3.2 հոդվածով (հանցավոր ճանապարհով ձեռք բերված գույքի օրինականացում)։
Ռամիզ Մեհդիևը Ալիևի վարչակազմի ղեկավարն է եղել 1995-2019 թվականներին։