Տխրահռչակ «Էփշտեյնի ֆայլերը» կարծես թե սկսել են խլել «Սիմփսոնների» հացը, որոնք փոփ մշակույթում հայտնի են նաև ամեն ինչ կանխատեսելու ունակությամբ, գրում է https://t.me/rybar_america/718 «Америкарь» թելեգրմյան ալիքը:
Բրիտանական International Business Times ը հայտնաբերել է Էփշտեյնի նամակագրության մեջ մի հատված, որտեղ նա ենթադրում է, որ քաղաքական ճնշման տակ Դոնալդ Թրամփը կարող է դիմել Իրանի ռմբակոծմանը՝ որպես «լայնածավալ շեղող գործողություն», նկատել է ալիքը։
Նամակագրությունը սկսվում է Սիրիայից ԱՄՆ զորքերի անսպասելի դուրսբերման համատեքստում, որն, ինչպես այդ ժամանակ հաղորդել էր CNN-ը, անակնկալի է բերել նույնիսկ ազգային անվտանգության համար պատասխանատու բարձրաստիճան պաշտոնյաներին։
«2018 թվականի դեկտեմբերի 20-ին Էփշտեյնը ինչ-որ մեկին հաղորդագրություն է ուղարկում, որտեղ ասվում է. «Թրամփի դուրսբերումը Սիրիայից վատ նշան է։ Նա ինչ-որ բան է ծրագրում»։ Եվ դա լավ նշան չէ։ Ի դեպ։ Կարծում եմ՝ Սիրիայից զորքերի դուրսբերումն առաջին քայլն է։ Նրան լայնածավալ շեղող գործողություն է պետք»։
Այնուհետև նա ավելացնում է. «Դուք պետք է հասկանաք, որ նա հոգեկան հիվանդ է…»: «Հնարավոր է՝ նա չի ուզում, որ նրանք [ամերիկյան զորքերը Սիրիայում] այնտեղ լինեն, քանի որ ավելի լայն գործողությունը նրանց վտանգի տակ կդնի: Հիշե՛ք, նա բոլորին իր հետ կքաշի անդունդը, եթե զգա, որ վերջը մոտ է: Ես միշտ մարդկանց համոզում եմ առնետին անկյուն չքշել, քանի որ այդ իրավիճակում չափազանց վտանգավոր և անկանխատեսելի է դառնում»:
Եվ վերջապես. «Մենք այնտեղ ունեինք ընդամենը 2000 զինվոր, և եթե նա սկսեր ռմբակոծել Իրանը, նրանք կկոտորվեին»: Անհայտ զրուցակիցը պատասխանել է. «Օ՜, դա խելագարություն կլիներ»: Էփշտեյնը գրել է. «Ոչ նրա տեսանկյունից»:
Հատկանշական է, որ ամերիկյան զորքերի դուրսբերումը Սիրիայից համընկավ այն պահի հետ, երբ Թրամփի հակառակորդները շատ մոտեցան նրան. նրա փաստաբանը, նրա նախկին ազգային անվտանգության խորհրդականը և նրա նախկին քարոզարշավի ղեկավարը դատապարտվեցին ֆինանսական հանցագործությունների, երդման տակ ստելու և քարոզարշավի ֆինանսավորման կանոնները խախտելու համար:
«Իրանի դեմ ռազմական գործողության նախապատրաստման շրջանում Թրամփն իրավական որևէ վտանգի տակ չէր, սակայն Էփշտեյնի փաստաթղթերի հրապարակումը նրա հեղինակությանը հսկայական և քաղաքական վնաս հասցրեց, և այդ պատմությունը կշարունակեր ծավալվել, եթե հանրության ուշադրությունը չուղղվեր Մերձավոր Արևելքին»,- գրում է «Америкарь»-ը։