Եվրոպական և ասիական շուկաները երեքշաբթի օրը տարբեր ուղղություններով դինամիկա են դրսևորել՝ սպասելով ԱՄՆ նախագահ Դոնալդ Թրամփի կողմից Իրանի համար սահմանված վերջնաժամկետին։ Թրամփը զգուշացրել է, որ եթե գործարքը չկայանա, նրանց վրա «դժոխք կթափվի», հայտնում է Euronews-ը։
ԶԼՄ-ների տվյալներով՝ երեքշաբթի օրը եվրոպական և ասիական բորսաներում սակարկությունները բացվել են չնչին անկումով։ Ներդրողները սպասում են Թրամփի սահմանած ժամկետի լրանալուն, որի արդյունքում Իրանը պետք է համաձայնի գործարքին, հակառակ դեպքում նրա էներգետիկ ենթակառուցվածքները կարող են ավիահարվածների թիրախ դառնալ։
Վերջնաժամկետը լրանում է ԱՄՆ արևելյան ժամանակով ժամը 20:00-ին (Կենտրոնական Եվրոպայի ժամանակով՝ 02:00-ին): Մինչ այդ պահը Թեհրանը պետք է ընդունի համաձայնագիրը, որը կապահովի նավագնացության ազատությունը Հորմուզի նեղուցով։ Հակառակ դեպքում, ինչպես հայտարարել է Թրամփը, երկրին սպասվում է քաղաքացիական ենթակառուցվածքների, այդ թվում՝ բոլոր էլեկտրակայանների և կամուրջների «ամբողջական ոչնչացում»։
Այսօր կեսօրին ամերիկյան էտալոնային նավթը վաճառվել է բարելի դիմաց 113,5 դոլարով, մինչդեռ համաշխարհային գնային ուղենիշ հանդիսացող Brent տեսակի նավթը՝ մոտ 111 դոլարով։ Երկու գնանշումներն էլ բարձրացել են մոտ 1%-ով։
Euro Stoxx 50 ինդեքսը և ավելի լայն եվրոպական Stoxx 600-ը նույնպես աճում են 0,5%-ով։
Բրիտանական FTSE 100-ը մնում է նախորդ փակման մակարդակին, գերմանական DAX 30-ն ավելանում է մոտ 0,2%-ով, իսկ ֆրանսիական CAC 40-ը և իտալական FTSE MIB-ը բարձրանում են գրեթե 1-ական տոկոսով։
Միևնույն ժամանակ, ասիական բորսաներում վերջնաժամկետի սպասման արձագանքը հակասական է եղել։
Հարավկորեական Kospi-ն կտրուկ աճել է 0,8%-ով, մինչդեռ Տոկիոյի Nikkei 225-ը փաստացի վաճառվում է զրոյական նշագծին մոտ մակարդակով։
Հոնկոնգյան Hang Seng-ը նվազել է 0,8%-ով, մինչդեռ Շանհայի համաթիվը արձանագրել է չնչին աճ՝ 0,3%-ով։ Ավստրալական ASX 200-ը և թայվանական Taiex-ը երկուսն էլ աճել են 2%-ով։
Երեքշաբթի առավոտյան ամերիկյան ինդեքսների ֆյուչերսները վաճառվել են անկմամբ՝ 0,1–0,3%-ի սահմաններում։
Այս նվազմանը նախորդել էր երկուշաբթի օրվա սակարկությունների վստահ փակումը. S&P 500 ինդեքսն աճել էր 0,4%-ով՝ եզրափակելով վերջին վեց շաբաթվա ընթացքում առաջին դրական շաբաթը։ Dow Jones արդյունաբերական ինդեքսն ավելացել էր 165 կետով կամ 0,4%-ով, իսկ Nasdaq համաթիվը բարձրացել էր 0,5%-ով։
Երկուշաբթին ամերիկյան բորսաների համար նաև առաջին հնարավորությունն էր արձագանքելու ուրբաթ օրը հրապարակված զեկույցին, համաձայն որի՝ ԱՄՆ գործատուներն անցյալ ամիս ավելի շատ աշխատակիցներ են վարձել, քան կանխատեսում էին տնտեսագետները։
Լրատվամիջոցների բնորոշմամբ՝ սրանք ոգևորող ազդակներ են այն տնտեսության համար, որն Իրանի հետ պատերազմի սկզբից ի վեր ստիպված է դիմակայել բենզինի գների ցավոտ աճին։
Ամերիկյան ավտոմոբիլային ասոցիացիայի (AAA) տվյալներով՝ սովորական բենզինի մեկ գալոնի միջին գինն ամբողջ երկրում այժմ կազմում է գրեթե 4,12 դոլար։ Մինչդեռ փետրվարի վերջին՝ ԱՄՆ-ի և Իսրայելի առաջին հարվածներից և պատերազմի մեկնարկից ընդամենը օրեր առաջ, այն 3 դոլարից ցածր է եղել։
Այլ շուկաներում ոսկին թանկանում է 0,77%-ով՝ մեկ ունցիայի համար հասնելով մոտ 4685 դոլարի, իսկ արծաթն ավելանում է մոտ 0,2%-ով՝ մեկ ունցիայի համար կազմելով 72,95 դոլար։
Զատկի կիրակի օրը Թրամփը վերջնաժամկետի լրանալուց առաջ վերջին անգամ հրապարակավ հաստատել է իր սպառնալիքները՝ հայտարարելով, որ «Երեքշաբթի օրը Իրանում կլինի Էլեկտրակայանների օր և Կամուրջների օր՝ բոլորը մեկում։ Նման բան դեռ չի եղել»։