Իսրայելի գործողությունները բռնազավթված Արևմտյան ափին և Գազայի հատվածում, կարծես թե, ուղղված են «մշտական ժողովրդագրական փոփոխությունների» ստեղծմանը, հինգշաբթի հայտարարել է ՄԱԿ-ի մարդու իրավունքների գերագույն հանձնակատար Ֆոլկեր Թյուրքը, հայտնել է Ֆրանսպրես գործակալությունը։
«Միասին վերցրած, Իսրայելի գործողությունները, կարծես թե, ուղղված են Գազայում և Արևմտյան ափում անդառնալի ժողովրդագրական փոփոխությունների ստեղծմանը, ինչը մտահոգություններ է առաջացնում էթնիկ զտումների վերաբերյալ»,- Ժնևում ՄԱԿ-ի Մարդու իրավունքների խորհրդին իր ելույթում ասել է Թյուրքը։
Թյուրքը, մասնավորապես, նշել է Իսրայելի կողմից Արևմտյան ափի հյուսիսում մեկ տարի տևած ռազմական գործողությունը, որի հետևանքով տեղահանվել է 32 հազար պաղեստինցի։
Արևմտյան ափի այլ վայրերում բեդվին անասնապահների ամբողջական համայնքներ ստիպված են եղել լքել իրենց տները իսրայելցի բնակիչների կողմից աճող հետապնդումների և բռնության պատճառով, ներառյալ՝ Ռամալլահից արևելք գտնվող Միխմասի և Հորդանանի հովտի Ռաս Այն ալ-Աուջայի մոտակայքում տարեսկզբից ի վեր։
Մոտավորապես երեք միլիոն պաղեստինցիներից բացի, Արևմտյան ափի բնակավայրերում և առաջնագծերում ապրում է ավելի քան 500 հազար իսրայելցի, որոնք, ըստ միջազգային իրավունքի, անօրինական են համարվում։
Այս ամիս Իսրայելը հաստատեց մի շարք նախաձեռնություններ, որոնք աջակցում էին ծայրահեղ աջ նախարարները, դրանց թվում՝ Արևմտյան ափում հողերը որպես «պետական սեփականություն» գրանցելու գործընթացի մեկնարկը և իսրայելցիներին այնտեղ ուղղակիորեն հող գնելու թույլտվությունը, որը դատապարտել էին մի շարք երկրներ։
Իսրայելի ներկայիս կառավարությունը արագացրել է բնակավայրերի ընդլայնումը՝ 2025 թվականին հաստատելով ռեկորդային 54 բնակավայր, ըստ Իսրայելի բնակավայրերի մոնիթորինգ իրականացնող Peace Now ՀԿ-ի։ Իսրայելն Արևմտյան ափը բռնաավթել է 1967 թվականից։ Գազայի հատվածում տարածքի 2,2 միլիոն բնակիչների մեծ մասը տեղահանվել է առնվազն մեկ անգամ՝ Իսրայելի վրա 2023 թվականի հոկտեմբերի 7-ին ՀԱՄԱՍ-ի աննախադեպ հարձակումից հետո պատերազմի սկսվելուց ի վեր։