Ուկրաինայի մայրաքաղաքում տեղի են ունեցել Հայոց ցեղասպանության 111-րդ տարելիցի հիշատակի միջոցառումներ: Ինչպես հաղորդել է AnalitikaUA-ն, այս մասին հայտնել է Ուկրաինայի հայերի միությունը։
Արարողությունը տեղի է ունեցել Կիեւի կենտրոնում՝ 20-րդ դարի հայ եւ ուկրաինացի զոհերի հիշատակին կանգնեցված խաչքարի մոտ: Մասնակցել են Կիեւի հայ համայնքի, Ուկրաինայի հայերի միության ներկայացուցիչներ, Հայ Առաքելական եկեղեցու հոգեւորականներ՝ եպիսկոպոս Մարկոս Հովհաննիսյանի գլխավորությամբ, ուկրաինական եկեղեցիների ներկայացուցիչներ, ինչպես նաեւ Հայաստանից եւ բարեկամ երկրներից եկած դիվանագետներ։
Միջոցառումների շրջանակում մատուցվել է աղոթք՝ ի հիշատակ Հայոց ցեղասպանության Սուրբ նահատակների, որին մասնակցել է Ուկրաինայի հույն կաթոլիկ եկեղեցու առաջնորդ, Նորին Սրբություն Սվյատոսլավը: Իր ելույթում նա ընդգծել է ուկրաինացի ժողովրդի համերաշխությունը հայ ժողովրդի հետ.
«Ուկրաինացի ժողովուրդը, որը վերապրել է իր սեփական ցեղասպանությունը եւ հետցեղասպանական ազգ է, խորապես հասկանում է հայ ժողովրդի ցավն ու տառապանքը, որն այսօր հիշատակում է 1915թ․ այս սարսափելի իրադարձությունները»։ Նա նաեւ նշել է պատմական հիշողության պահպանման կարեւորությունը. «Մենք պետք է հիշենք ճշմարտությունը՝ ապագայում նման հանցագործությունների կրկնությունը կանխելու համար»։
Գերապատիվ Սվյատոսլավն ընդգծել է հիշատակի հոգեւոր նշանակությունը. «Ձեր ցավը մեր ցավն է։ Բայց այսօր ձեր սուրբ նահատակները մեր բարեխոսներն են երկնքում»։
Ինչպես նշվել է, հիշատակի միջոցառումներ են տեղի ունեցել ոչ միայն Կիեւում, այլեւ Ուկրաինայի մի քանի շրջաններում, որտեղ որ ռազմական իրավիճակը թույլ է տվել։ AnalitikaUA-ի տվյալներով՝ չնայած պատերազմին, հիշատակի միջոցառումներ են տեղի ունեցել երկրի մոտ 20 շրջաններում՝ ճակատամերձ Խերսոնից մինչեւ Դնեպր եւ Լվով։