Հնդկաստանն իր կողմից կառավարվող Քաշմիրում 26 զբոսաշրջիկների սպանությունից հետո հայտարարել է Պակիստանի դեմ միջոցառումների մասին, հաղորդում է BBC News-ը:
Դրանք ներառում են երկու երկրները կապող գլխավոր սահմանային անցակետի փակումը, ջրի բաժանման պայմանագրի կասեցումը և դիվանագետների արտաքսումը:
Հնդկաստանը միաժամանակ չեղյալ է հայտարարել պակիստանցիներին տրված որոշ վիզաներ և դրանց տերերին հրամայել է երկու օրվա ընթացքում լքել երկիրը՝ Պակիստանից պահանջելով նաև դադարեցնել անդրսահմանային ահաբեկչությանն աջակցելը, մի բան, որն Իսլամաբադը հերքում է:
Երեքշաբթի Հիմալայան Պահալգամի գեղատեսիլ վայրում հավաքված զբոսաշրջիկների սպանությունը վերջին տարիներին Քաշմիրի ամենամահաբեր միջադեպերից մեկն էր:
Հիմնականում մահմեդականներով բնակեցված տարածաշրջանը տասնամյակներ շարունակվող ապստամբության ճիրաններում է: Հնդկաստանի կառավարությունը կտրուկ արձագանքել էր հարձակմանը և դրա համար անուղղակիորեն մեղադրել էր Պակիստանին:
Հնդկաստանի անվտանգության գործակալությունները ենթադրում են, որ հարձակման հետևում կանգնած է «Քաշմիրի դիմադրություն» կոչվող խումբը: