Ռուսաստանի նախագահի ներդրումների և արտասահմանյան երկրների հետ տնտեսական համագործակցության հարցերով հատուկ ներկայացուցիչ Կիրիլ Դմիտրիևը կժամանի Միացյալ Նահանգներ՝ նախագահական վարչակազմի անդամների հետ հանդիպումների համար, հաղորդում է Reuters-ը՝ հղում անելով աղբյուրներին։
Գործակալության տվյալներով՝ Դմիտրիևը շաբաթ օրը՝ հունվարի 31-ին, կժամանի Մայամի՝ ԱՄՆ վարչակազմի պաշտոնյաների հետ բանակցություններ վարելու համար։
Մոսկվայի և Կիևի միջև բանակցությունների նոր փուլը նախատեսված է հաջորդ օրը՝ փետրվարի 1-ին, Աբու Դաբիում։ Դմիտրիևը նախորդ եռակողմ բանակցություններին մասնակցել է հունվարի 23-24-ին Արաբական Միացյալ Էմիրություններում որպես ռուս-ամերիկյան տնտեսական խմբի ղեկավար։
Դմիտրիևը ավելի վաղ՝ 2025 թվականի դեկտեմբերի 20-ին այցելել էր Մայամի, որտեղ հանդիպել էր ԱՄՆ նախագահի հատուկ բանագնաց Սթիվ Ուիթքոֆի, Դոնալդ Թրամփի փեսայի՝ Ջարեդ Քուշների և Դաշնային գնումների ծառայության (FAS) հանձնակատար Ջոշ Գրյունբաումի հետ։ Այդ ժամանակ քննարկվել է Ուկրաինայում հակամարտության կարգավորման ծրագիրը։
Փետրվարի 1-ին Աբու Դաբիում անցկացվելիք բանակցությունները կանցկացվեն երկկողմանի ձևաչափով, սակայն Միացյալ Նահանգների մասնակցությունը հնարավոր է, պարզաբանել է պետքարտուղար Մարկո Ռուբիոն՝ շեշտելով, որ Ուիթքոֆը և Քուշները հանդիպմանը չեն մասնակցի։